नेपाल हृदयरोग निवारण प्रतिष्ठानद्वारा हेटौँडा अस्पताललाई मुटुरोगीका लागि ईन्जेक्सन हस्तान्तरण

नेपाल हृदयरोग निवारण प्रतिष्ठान केन्द्रीय कार्यालय ललितपुरले हेटौँडा अस्पताललाई मुटुरोग तथा बाथका बिरामीको उपचारका लागि आवश्यक ईन्जेक्सन हस्तान्तरण गरेको छ। मंगलबार प्रतिष्ठानले प्रत्येक २१ दिनमा लगाउनुपर्ने पेनिडुरा (पेनसिलिन) समूहअन्तर्गतको रेहुजा नामक ईन्जेक्सन २०० माइल्ड अस्पताललाई उपलब्ध गराएको हो।

नेपाल हृदयरोग निवारण प्रतिष्ठान का आजीवन सदस्य लक्ष्मण पौडेलका अनुसार अस्पतालको माग बमोजिम उक्त ईन्जेक्सन प्रदान गरिएको हो। ईन्जेक्सन हेटौँडा अस्पताल का निर्देशक डा. रामचन्द्र सापकोटा र डा. हरि बहादुर खड्कालाई औपचारिक रूपमा हस्तान्तरण गरिएको थियो।

हस्तान्तरण कार्यक्रममा नेपाल हृदयरोग निवारण प्रतिष्ठान मकवानपुरका अध्यक्ष विजयकुमार वैद्यसहित सानुकाजी पाण्डे, त्रिलोकमोहन थिके, आशा ढकाल, लक्ष्मण पौडेल र उदय भट्टराईको उपस्थिति रहेको थियो। कार्यक्रम नेपाल हृदयरोग निवारण प्रतिष्ठान मकवानपुरको समन्वयमा सम्पन्न भएको जनाइएको छ।

समयमै औषधि उपलब्ध गराइँदा मुटुरोग तथा बाथका बिरामीको नियमित उपचारमा सहजता पुग्ने र उपचार निरन्तरतामा सहयोग पुग्ने अपेक्षा गरिएको छ।

स्रोत: सम्बृद्ध समाज