राक्सिराङ गाउँपालिकामा नेपाली कांग्रेस कार्यसमितिको पूर्ण बैठक सम्पन्न

राक्सिराङ (मकवानपुर) । नेपाली कांग्रेस राक्सिराङ गाउँपालिका कार्यसमितिको पूर्ण बैठक प्रतिनिधिसभा निर्वाचनलाई लक्षित गर्दै सम्पन्न भएको छ। बैठक प्रतिनिधिसभा निर्वाचन क्षेत्र नम्बर १ की उम्मेदवार महालक्ष्मी उपाध्याय डिना को प्रमुख आतिथ्यता तथा प्रतिनिधिसभा निर्वाचन क्षेत्र नम्बर २ का उम्मेदवार बुद्ध लामा को विशेष आतिथ्यतामा सम्पन्न गरिएको हो।

बैठकमा आगामी प्रतिनिधिसभा निर्वाचनका लागि पार्टीको संगठन सुदृढीकरण, चुनावी रणनीति, जनसम्पर्क अभियान तथा स्थानीय तहमा कांग्रेसको गतिविधिलाई प्रभावकारी बनाउने विषयमा विस्तृत छलफल गरिएको थियो। सहभागीहरूले पार्टी संगठनलाई गाउँ–वडास्तरसम्म सक्रिय बनाउँदै जनतासँग प्रत्यक्ष संवाद बढाउनुपर्ने आवश्यकता औंल्याएका थिए।

प्रमुख अतिथि उपाध्यायले लोकतन्त्र, समावेशिता र जनउत्तरदायी शासनका लागि नेपाली कांग्रेसको भूमिका महत्वपूर्ण रहेको उल्लेख गर्दै निर्वाचनमा पार्टीलाई विजयी गराउन सबै कार्यकर्ताले एकताबद्ध भएर लाग्नुपर्ने बताइन्। उनले राक्सिराङ क्षेत्रका जनताको समस्या र आवश्यकतालाई संसद्मा प्रभावकारी रूपमा उठाउने प्रतिबद्धता व्यक्त गरिन्।

विशेष अतिथि लामा ले पार्टी कार्यकर्ता र जनप्रतिनिधिबीचको समन्वय बलियो बनाउँदै संगठनलाई थप गतिशील बनाउने आवश्यकता औंल्याए। उनले जनताको विश्वास जित्ने गरी सकारात्मक र जिम्मेवार राजनीतिक अभ्यासमा केन्द्रित हुन कार्यकर्तालाई आग्रह गरे।

बैठकमा राक्सिराङ गाउँपालिका कार्यसमितिका पदाधिकारी, वडा सभापतिहरू, पार्टीका अग्रज नेता, कार्यकर्ता तथा शुभेच्छुकहरूको उल्लेखनीय उपस्थिति रहेको थियो। सहभागीहरूले निर्वाचनमा कांग्रेसलाई बलियो रूपमा प्रस्तुत गर्न सामूहिक प्रयास आवश्यक रहेको निष्कर्ष निकालेका छन्।

कार्यक्रम सफलतापूर्वक सम्पन्न भएको जनाउँदै पार्टीले आगामी दिनमा यस्ता बैठक र छलफललाई निरन्तरता दिने जनाएको छ।